Oʻzbekiston delegatsiyasi Parij-2024 yozgi Olimpiya oʻyinlarida bir qator sport turlarida debyut qiladi. Jumladan, kamondan otish sportida. Ziyodaxon Abdusattorova mazkur yoʻnalishda Olimpiadada ishtirok etgan dastlabki oʻzbekistonlik sportchi sifatida tarixga kiradi.

Abdusattorova Ziyodaxon Dilshodjon qizi 2001-yil 17-aprel kuni Fargʻona viloyati Margʻilon shahrida dunyoga kelgan. 2018-yildan Oʻzbekiston terma jamoasi aʼzosi. Murabbiyi Irina Savinova. Hamyurtimiz bir necha bor Osiyo kubogida sovrindorlar qatoridan joy olgan. Konya-2021 Islom birdamligi oʻyinlarida aralash jamoaviy dasturda shohsupaning uchinchi pogʻonasiga koʻtarilgan. Joriy yil “Zulfiya” nomidagi davlat mukofoti bilan taqdirlangan.

2023-yil noyabr oyida Tailandda oʻtgan Osiyo litsenzion turniridagi muvaffaqiyatli ishtiroki orqali Parij-2024 ishtirokchilari orasidan joy oldi.