Poytaxtimizda ot sportining konkur yoʻnalishi boʻyicha Yevrosiyo ligasi Millatlar kubogining bosqichi oʻtkazilayotgani haqida maʼlum qilgan edik. Hamyurtlarimiz jamoaviy yoʻnalishda kechgan musobaqaning navbatdagi kunida muvaffaqiyatli ishtirok etishdi.

Shiddatli bahslarda Aʼzam Tolibboyev, Oqil Sobirjonov kabi tajribali chavandozlar qatorida Abdurahmon Abdullayev va Dilshod Shokirov kabi yosh iqtidor egalari yurtimiz sharafini himoya qilishdi. Sportchilarimiz birinchi mashqning oʻzidayoq gʻoliblikka asosiy daʼvogar ekanliklarini namoyish etishdi va ustunlikni bellashuvlar nihoyasigacha saqlab qoldilar. Yakunda jamoamiz birinchi, Qozogʻiston ikkinchi va Qirgʻiziston vakillari uchinchi oʻrinni egallashdi.