31-martdan – 11-aprelga qadar Tailandning Pxuket shahri ogʻir atletika boʻyicha Jahon kubogiga mezbonlik qildi. Sayyoramizning 110 davlatidan 466 sportchi qatnashgan musobaqada Oʻzbekiston terma jamoasi 3 ta oltin va 1 ta bronza medallariga sazovor bo’ldi. Ahamiyatlisi, ushbu natija bilan erkaklar terma jamoamiz medallar jamg’arish bo’yicha KXDR, Xitoy va Armanistondan so’ng to’rtinchi o’rinni egalladi.

Barcha medallar erkaklar oʻrtasida -109 kg vazn toifasidagi bahslarda qoʻlga kiritildi. Tokio-2020 Olimpiya oʻyinlari chempioni Akbar Joʻrayev ushbu vaznda tengsiz ekanini koʻrsatib, barcha yoʻnalishlarda oltin medallarni qoʻlga kiritgan boʻlsa, umidli polvonlarimizdan biri Sharofiddin Amriddinov dast koʻtarish mashqida bronza medali bilan taqdirlandi.