Toshkent viloyatidagi “Yangiobod” sport bazasida taekvondo WT bo’yicha O’zbekiston, Iordaniya va Rossiya terma jamoalari ishtirokidagi xalqaro o’quv-mashg’ulot yig’ini qizg’in davom etmoqda. Mashg’ulotlarda O’zbekiston terma jamoasidan 21, Iordaniyadan 5 va Rossiyadan 32 nafar atlet qatnashyapti.

Ular orasida Tokio-2020 yozgi Olimpiya o’yinlari chempionlari Ulug’bek Rashitov (O’zbekiston) va Vladislav Larin (Rossiya), kumush medal sohiblari Solih El-Sharabati (Iordaniya) va Tatyana Minina (Rossiya), bronza medali egasi Mixail Artomonov (Rossiya), shuningdek, jahon chempionatlarining g’olib va sovrindorlarini uchratish mumkin. 29-mart kuni yig’in doirasida sparring janglari ham o’tkazilib, murabbiylar shtabi sportchilarning holatini yana bir karra ko’zdan kechirib olishdi.