Oʻzbekiston dzyudo federatsiyasi 1-3-mart kunlari oʻtadigan Toshkent “Katta dubulgʻa” turniri uchun terma jamoa tarkibini eʼlon qildi. Unga koʻra, musobaqada 28 nafar erkak va 25 nafar ayol, jami 53 sportchi yurtimiz sharafini himoya qiladi. Qayd etish joiz, reglament boʻyicha mezbon davlat har bir vazn toifasida 4 nafardan sportchisini roʻyxatdan oʻtkazishi mumkin.

Ahamiyatlisi, yil boshida 2 yirik turnirlarda oltin medalni qoʻlga kiritgan Diyora Keldiyorova tarkibga kiritilmagan. Maʼlum boʻlishicha, murabbiylar shtabi -52 kg vazn toifasida jahon reytingi peshqadamiga aylangan hamyurtimizga dam berishga qaror qilgan. Tarkibda Davlat Bobonov, Muzaffarbek Toʻraboyev, Alisher Yusupov, Gulnoza Matniyazova va boshqa barcha taniqli dzyudochilarni uchratish mumkin.