Yunon-rum kurashi boʻyicha Oʻzbekiston terma jamoasi uchun masʼuliyatli musobaqalar yetib kelmoqda. Sportchilarimiz hozirda Toshkentda oʻquv-mashgʻulot yigʻinini olib borishyapti.

Jamoa 2023-yil sentyabrda oʻtgan jahon chempionati orqali Parij-2024 yozgi Olimpiya oʻyinlariga 2 ta yoʻllanma qoʻlga kiritgan edi. Endigi maqsad aprel oyida Qirgʻizistonda tashkil etiladigan Osiyo, mayda Turkiya mezbonlik qiladigan jahon litsenzion turnirlari orqali qolgan vaznlarda ham maksimal yoʻllanmalarni jamgʻarish. Litsenziatlar Islomjon Bahromov va Aram Vardanyan esa Osiyo chempionatida Olimpiadaga tayyorgarliklarini sinovdan oʻtkazib olishadi.