MOQ raisi oʻrinbosari Sherzod Tashmatov boshchiligidagi ishchi guruh ayni paytda Turkiyaning Belek shahrida yigʻin oʻtkazayotgan baydarka va kanoeda eshkak eshish boʻyicha Oʻzbekiston terma jamoasining mashgʻulotlarini kuzatishda davom etadi. Bugun u sportchi va murabbiylar bilan oldinda turgan rejalar yuzasidan suhbat oʻtkazdi.

Qayd etish joiz, Turkiya yigʻinidan xorijlik murabbiylar, xususan, bolgariyalik Andrian Douchev hamda vengriyalik Natasha Douchev-Yanich terma jamoaga jalb qilingan. Suhbat davomida atletlarni yirik musobaqalar, xususan, aprel oyida Yaponiyada oʻtadigan Parij-2024 litsenzion turniriga puxta tayyorlash, mashgʻulotlarda mazkur sport turidagi zamonaviy metodikalarga yondashish muhimligi taʼkidlandi.

Shuningdek, jamoadagi muammo va kamchiliklar ham koʻrib chiqildi. Sherzod Tashmatov sportchilarni chuqurlashtirilgan tibbik koʻrikdan oʻtkazish masalasiga ham toʻxtaldi. Bu borada jamoa shifokori va murabbiylar shtabi ishchi guruhni mazkur yoʻnalishdagi rejalar, terma jamoa aʼzolarining salomatligi haqidagi maʼlumotlar bilan tanishtirdi.