Gimnastikachilarimiz Toshkentda yangi mavsumga tayyorlanishmoqda
Joriy yil Toshkent badiiy va sport gimnastikasi boʻyicha litsenzion Osiyo chempionatlariga mezbonlik qiladi. Hozirda har ikki yoʻnalishdagi terma jamoalarimiz ushbu startlarga qizgʻin tayyorgarlik koʻryapti. Ikkala dasturda ham xalqaro musobaqalar fevral oyidan boshlanadi va atletlarimiz mashgʻulotlar davomida yangi elementlar ijrosi ustida ishlashmoqda.
Parij-2024 litsenziati Taxmina Ikromova alohida dastur asosida shugʻullanayotgan boʻlsa, guruh mashqida gilamga chiqadigan qizlarimiz ham oʻz mahoratlarini oshirib borishmoqda. Oksana Chusovitina boshchiligidagi sport gimnastikasi boʻyicha ayollar terma jamoamiz aʼzolari ham oʻz ijrolarini takomillashtirishyapti. Yigitlarimiz esa bugun xalqaro oʻquv-mashgʻulot yigʻinida ishtirok etish uchun Gruziyaga yoʻl olishdi va tayyorgarlikning qolgan qismini Tbilisida oʻtkazishadi.
