Dzyudo bo'yicha O'zbekiston terma jamoasi yangi yilning ilk kunlaridayoq 2024-yilgi rejalar sari harakatni boshladi. Terma jamoa bugun tunda 1 oydan oshiq davom etadigan Yevropa safariga yo’l oldi.

Sportchilarimiz dastlab, 2-7-yanvar kunlari Italiyada, 7-15-yanvar kunlari Avstriya, 15-20-yanvar kunlari esa Germaniyada yig’in o’tkazishadi. Mazkur mamlakatlarda olib boriladigan xalqaro o'quv-mashg'ulot yig’inlaridan keyin dzyudochilarimiz 26-28-yanvar kunlari Portugaliyada o’tadigan Gran-Pri, so’ng 2-4-fevral kunlari Fransiya mezbonlik qiladigan “Katta dubulg’a” musobaqasida ishtirok etishadi. Yevropa safariga jami 25 nafar sportchi jalb etilgan.