“Uzbekistan Global Tour 2023" turniri oʻz nihoyasiga yetdi
Poytaxtimizdagi “Universal Horses Stable” ot sporti majmuasida konkur boʻyicha “Uzbekistan Global Tour 2023” musobaqasining 11-bosqichi boʻlib oʻtdi. Qayd etish joiz, mazkur bosqich turnirning yakuniy bahsi boʻlgani bois barcha chavandozlar imkon qadar oʻz mahoratlarini namoyish etishga harakat qilishdi.
Murosasiz bellashuvlar yakunida Eʼzoza Umarxodjayeva (“Solist” laqabli tulporda) “F” (110 sm, toʻsiq balandligi), Samandar Muhammadov (“Arbat”) “E” (120 sm), Mirzohid Musayev (“Getsbi”) “B” (125-130 sm), Sergey Antonovich (“Gayanto”) “D” (135 sm), Aʼzam Tolibboyev (“Bozart De Ruet”) “A” toifasida (150 sm) gʻalaba qozondi. Musobaqa nihoyasida tashkilotchilar chavandozlarni yilni muvaffaqiyatli yakunlaganlari bilan qutlab, ularning kelgusi faoliyatida ham omad tilashdi.
