Xushxabar! Taekvondochilarimiz Parij-2024 Olimpiadasining aralash jamoaviy dasturida koʻrgazmali chiqishda ham qatnashishadi
Taekvondo WT boʻyicha aralash jamoaviy yoʻnalishi yirik kompleks musobaqalar dasturiga kiritilmoqda. Ushbu yoʻnalish Parij-2024 ga koʻrgazmali dastur sifatida kiritilgan boʻlsa, Los-Anjeles-2028 Olimpiadasidan boshlab medallar jamlanmasi oʻynalishi kutilmoqda.
Bugun Xitoyda yakuniga yetgan Jahon kubogida Oʻzbekiston terma jamoasining qoʻlga kiritgan kumush medali katta ahamiyatga ega. Boisi, terma jamoa tarkibida Ulugʻbek Rashitov, Svetlana Osipova kabi yetakchilar ishtirok etishmagan boʻlsa ham, bellashuvlar davomida ushbu sport vatani boʻlmish Janubiy Koreya jamoasi magʻlub etildi. Jangovar tarkibda qatnashgan Xitoy bilan tengma teng raqobat olib borildi.
Jahon kubogidagi natija sportchilarimizga Parij-2024 Olimpiadasi doirasida oʻtkaziladigan koʻrgazmali dasturda qatnashish imkoniyatini taqdim qildi. Unda faqatgina Fransiya, Oʻzbekiston, Xitoy va Janubiy Koreya jamoalari oʻrtasida bahs kechadi.
