Ajoyib yangilik: Shohruh Davlatov marafon dasturida Parij-2024 yoʻllanmasiga ega boʻldi
Yengil atletika boʻyicha Oʻzbekiston terma jamoasi aʼzosi, yarim marafon boʻyicha milliy rekord sohibi Shohruh Davlatov marafon dasturida (42 km, 195 metr) Parij-2024 Olimpiada normativini bajarishga muvaffaq boʻldi. Hamyurtimiz Ispaniyada oʻtgan nufuzli “Valencia Marathon Trinidad Alfonso” musobaqasidagi natijasi orqali 4 yillikning eng nufuzli musobaqasida ishtirok etish imkoniyatiga ega boʻldi.
Davlatov mazkur turnirda 2:07:02 (2 soat, 7 daqiqa, 2 soniya) natija qayd etdi. Bu Parij-2024 Olimpiadasi uchun qoʻyilgan talabdan 1 daqiqa, 8 soniya yaxshiroq natija. Shuningdek, Shohruh ushbu koʻrsatkich bilan 38 yil avval oʻrnatilgan milliy rekordni (2:13:28) ham yangilashga muvaffaq boʻldi. Valensiyadagi nufuzli musobaqada Davlatov umumiy hisobda 18-oʻrinni egallagan.
Shuni alohida taʼkidlash oʻrinliki, surxondaryolik atletimiz ushbu natijaga erishish uchun soʻnggi ikki yil ichida bir necha oy dunyoning eng kuchli marafonchilari yetishib chiqqan Keniyada oʻquv-mashgʻulot yigʻinlarida ishtirok etdi. Bu Oʻzbekiston delegatsiyasining Parij-2024 Olimpiadasiga qoʻlga kiritgan 15-yoʻllanmasi.
