Misrning Sharm El-Sheyx shahrida Xalqaro qilichbozlik federatsiyasining (FIE) navbatdagi Kongressi o‘tkazildi. Tadbir davomida ortda qolgan davr mobaynida qilingan ishlar sarhisobi o‘tkazilib, yangi yil uchun rejalar ko‘rib chiqildi.

Kongressda O‘zbekiston qilichbozlik federatsiyasi rahbariyati ham ishtirok etdi. Yakunda FIE reytingida birinchi o‘rinni egallagan eng yaxshi sportchi va jamoalarini taqdirlash marosimi o‘tkazildi. Ahamiyatlisi, sablyachi yigitlarimizdan iborat O‘zbekiston yoshlar terma jamoasi mazkur toifada dunyoning eng yaxshi jamoasi deb e’tirof etildi.

Ma’lumot uchun, sablyachilarimiz yil davomida shu paytgacha o‘tgan yoshlar o‘rtasidagi Jahon kubogi bosqichlarida 4 ta oltin, 3 ta kumush va 2 ta bronza medallarini qo‘lga kiritishgan.