Dam olish kunlari dunyoning bir qator shaharlarida qilichbozlikning barcha yoʻnalishlarida yoshlar oʻrtasidagi Jahon kubogi bosqichidan oʻrin olgan bellashuvlar oʻtkazildi. Ahamiyatlisi, unda ishtirok etgan hamyurtlarimiz sovrinli oʻrinlarni egallashdi.

Xabar berganimizdek, 18-19-noyabr kunlari Toshkent sablya boʻyicha qizlar oʻrtasidagi bahslarga mezbonlik qilib, unda yurtdoshlarimiz ham yakkalik, ham jamoaviy dasturda oltin medallarni qoʻlga kiritishdi. Yosh qilichbozlarimizning boshqa mamlakatlardagi ishtiroki ham muvaffaqiyatli boʻldi.

Tunis shahri sablya boʻyicha yigitlar oʻrtasidagi bahslarni oʻzida qabul qildi. Unda oʻsmirlar oʻrtasidagi jahon chempioni Zuhriddin Qodirov yakkalik dasturida kumush medalga sazovor boʻldi. Zuhriddin, shuningdek, jamoaviy dasturda Islombek Abdazov, Musa Aymuratov, Azizbek Dauletnazarov bilan shohsupaning ikkinchi pogʻonasidan joy oldi.

Peru mezbonlik qilgan shpagachi qizlar bahsida esa Shahzoda Egamberdiyeva, Dilnaz Murzatayeva, Bibimaryam Saparovadan iborat trio jamoaviy dasturda bronza medallari bilan taqdirlandi.