17 noyabr kuni “Humo arena”da o‘tadigan professional boks oqshomi oldidan matbuot anjumani tashkil etildi. Unda Butunjahon boks kengashi (WBC) prezidenti Maurisio Sulaymon, O‘zbekiston professional boks federatsiyasining birinchi vise-prezidenti Gʻofur Rahimov, yurtimizda mehmon bo‘lib turgan jahon boksi yulduzi Evander Xolifild, 2 kundan so‘ng ringga ko‘tariladigan bokschilar va OAV xodimlari ishtirok etishdi. 

Tadbirda Maurisio Sulaymon WBC ning 61-konvensiyasi yuqori saviyada o‘tkazilayotganini ta’kidlab, bo‘lajak janglarda bokschilarga omad tiladi. O‘z navbatida, hamyurtlarimiz bildirilgan ishonchni oqlashga va’da berishdi. Xususan, Tokio-2020 Olimpiadasi chempioni Bahodir Jalolov Parij-2024 Olimpiadasidan so‘ng bor e’tiborini WBC chempionlik kamarini qo‘lga kiritishga qaratishini bildirdi. Shuningdek, barcha muxlislarni bo‘lajak oqshomda bokschilarimizni qo‘llab-quvvatlashga chaqirdi. 

Tadbir davomida jurnalistlar bokschilarimizning tayyorgarligi, ularning kelgusi rejalari va raqiblari haqidagi qiziqarli savollariga atroflicha javob olishdi.