Saytning eski versiyasi

Ayni paytda Oʻzbekiston Respublikasi Yoshlar siyosati va sport vazirining oʻrinbosari Shahrullo Mahmudov hamda Oʻzbekiston Milliy Olimpiya qoʻmitasi Bosh kotibi Oybek Kasimov boshchiligidagi mamlakatimiz delegatsiyasi Rossiyaning Sochi shahrida tashkil etilgan Xalqaro yakkakurash festivalida ishtirok etmoqda. Mazkur tadbir Rossiya boks federatsiyasi va Krasnodar oʻlkasining boks federatsiyasi tashabbusi bilan tashkil etilgan boʻlib, loyiha Rossiya-Oʻzbekiston oʻrtasidagi doʻstona aloqalarini sport sohasida yanada mustahkamlashga bagʻishlangan. Uning doirasida oʻzbek milliy kurashi va boks boʻyicha har ikki mamlakatning taniqli sportchilari ishtirokida bellashuvlar oʻtkazilishi rejalashtirilgan.

Dastavval, rus-oʻzbek xalqi oʻrtasidagi doʻstona munosabatning sport sohasida yoʻnalishlarini yangi bosqichga olib chiqish mavzusida alohida uchrashuv oʻtkazildi. Unda Rossiya-Oʻzbekiston tomonlari hamkorlikning yangi qirralarini muhokama qilishdi.

Mazkur uchrashuvda Rossiya Olimpiya qoʻmitasi Bosh kotibi Rodion Plituxin uzoq yillardan beri rivojlanib borayotgan iliq hamkorlikni kelgusida ham davom ettirishdan mamnun ekanini bildirdi. Shuningdek, u sportning ilm-fan va gumanitar sohalardagi aloqalarni mustahkamlash maqsadida ikki tomon oʻrtasida imzolangan memorandum bugungi kunda professional atletlarni tayyorlashda muhim hujjat boʻlib turganini taʼkidladi. Oʻz navbatida, Oybek Kasimov Oʻzbekiston delegatsiyasining yirik sport musobaqalarga hozirlik koʻrishida Rossiya kabi ulkan sport derjavasi bilan hamkorlik as qotishini qoʻshimcha qildi.

Dasturga muvofiq, tomonlar kurash boʻyicha xalqaro musobaqaning guvohi boʻlishdi. Qayd etish joiz, Rossiyada kurash boʻyicha xalqaro musobaqa birinchi bor tashkil etildi. Unda 5 mamlakatdan tashrif buyurgan polvonlar bahs olib borishdi. Rejaga koʻra, bugun boks boʻyicha Rio-2016 Olimpiadasi chempionlari Hasanboy Doʻsmatov va Fazliddin Gʻoibnazarov rossiyalik nomdor raqiblariga qarshi ringga koʻtarilishadi.