Ayni kunlarda dunyoning turli mamlakatlarida qilichbozlik boʻyicha yoshlar oʻrtasida Jahon kubogi bosqichidan oʻrin olgan musobaqalar boʻlib oʻtmoqda. El-Salvador mamlakati shpaga qurolida kechayotgan bellashuvlarga mezbonlik qilyapti.

Quvonarlisi, unda ishtirok etgan Oʻzbekiston terma jamoasi aʼzolari birinchi kunda 1 tadan oltin va bronza medallarini qoʻlga kiritishdi. Qizlar oʻrtasida kechgan bellashuvlarda Xanchjou-2022 Osiyo oʻyinlari sovrindori Dilnaz Murzatayeva barcha raqiblarini magʻlubiyatga uchratib, oltin medalga sazovor boʻldi. Murzatayevaga yarim finalda 14:15 hisobida imkoniyatni boy bergan boshqa bir hamyurtimiz Bibimaryam Saparova esa bronza medali bilan taqdirlandi.