Toshkent viloyatida zamonaviy beshkurashning toʻrtkurash yoʻnalishi boʻyicha oʻsmirlar va yoshlar oʻrtasida Oʻzbekiston kubogi boʻlib oʻtdi. Bahslar qilichbozlik, suzish va lazer-ran (yugurish va oʻq otish) yoʻnalishlarida oʻtkazildi.

Kutilganidek, yoshlar toifasida kechgan bellashuvlarda oʻsmirlar oʻrtasidagi jahon chempionati finalchisi Samira Abzalova gʻalaba qozondi. Oʻsmirlar oʻrtasida esa Mubina Qodirjonova zafar quchdi. Yigitlar toifasida Asliddin Baxtiyorov oʻsmirlar, Doniyor Rahimov esa yoshlar oʻrtasida oltin medallarni qoʻlga kiritdi.

Yakunda eng koʻp sportchisi shohsupaga koʻtarilgan Andijon viloyati jamoasi bosh sovringa ega chiqdi. Qayd etish joiz, ushbu musobaqa yangi mavsum oldidan oʻz yosh toifalarida terma jamoaga nomzod sportchilarni saralab olish imkoniyatini taqdim qildi.