Sportimiz mutasaddilari paraatletlarimizga oq yoʻl tilashdi
Ertaga Xitoyning Xanjchou shahrida IV Para Osiyo oʻyinlari boshlanadi. Oʻzbekiston delegatsiyasi musobaqaga joʻnab ketishi oldidan Osiyo Olimpiya kengashi vitse-prezidenti O.Umarov, Yoshlar siyosati va sport vaziri oʻrinbosarlari - Sh.Mahmudov va M.Ismoilov, Oʻzbekiston Milliy Olimpiya qoʻmitasi Bosh kotibi O.Kasimov, qoʻmita raisi oʻrinbosarlari – A.Kamilov hamda Sh.Tashmatovlar Milliy paralimpiya qoʻmitasiga tashrif buyurishdi. Ularni Osiyo Paralimpiya qoʻmitasi vitse-prezidenti – Oʻzbekiston Milliy paralimpiya qoʻmitasi raisi M.Tashxodjayev qarshi oldi.
Tantanali kuzatish tadbiri oldidan Oʻzbekiston delegatsiyasining ushbu kompleks musobaqaga koʻrgan tayyorgarligi, kutilayotgan natijalarga bagʻishlangan taqdimot boʻlib oʻtdi. Unda har bir yoʻnalishda kutilayotgan natijalar, hamyurtlarimizning tayyorgarligi boʻyicha batafsil maʼlumot berildi.
Para Osiyo oʻyinlarida ishtirok etadigan Oʻzbekiston delegatsiyasi bugun Xanchjouga yetib bordi. Maʼlumot uchun, bu galgi musobaqada delegatsiyamiz 11 sport turida 108 nafar paraatlet bilan ishtirok etadi. Oʻzbekiston Milliy Olimpiya qoʻmitasi boʻlajak bahslarda hamyurtlarimizga omad va zafarlar tilaydi.
