Joriy yilning 18-26-noyabr kunlari Qatarning Doxa shahrida oʻq otish sporti turlari boʻyicha Jahon kubogining final bosqichi boʻlib oʻtadi. Xalqaro oʻq otish sporti federatsiyasi mazkur musobaqada ishtirok etish uchun ilk bor Oʻzbekiston terma jamoasining 2 nafar aʼzosiga taklifnoma joʻnatdi.

Mazkur sport turida Jahon kubogining final bosqichi yilda 1 marotaba oʻtadigan nufuzli turnir hisoblanadi. Unda oʻsha yil dunyo birinchiligida shohsupaga koʻtarilgan 3 sportchi, shuningdek, yil davomida oʻtgan Jahon kubogining 6 ta bosqichida eng yuqori reyting ochkolarini jamgʻargan 12 nafar mergan ishtirok eta oladi.

Bu yilgi Jahon kubogi bosqichlaridagi muvaffaqiyatli ishtiroki orqali kuchli 12 talikka kirgan Muhammad Kamalov hamda Vladimir Svechnikov pnevmatik toʻpponchadan otish dasturida Doxada oʻtadigan final bahslariga yoʻl olishdi. Maʼlumot uchun, Oʻzbekiston terma jamoasi aʼzolari soʻnggi marta 2008-yil bunday nufuzli musobaqada ishtirok etishgan boʻlsa, birinchi bor 2 nafar sportchi bilan final bosqichiga yoʻl olishdi.