O‘smirlar Olimpiadasi uchun revansh olindi yoxud shohsupada ikki o‘zbek polvoni
Poytaxtimizda davom etayotgan og‘ir atletika bo‘yicha yoshlar o‘rtasidagi jahon chempionatining bugungi kuni terma jamoamiz uchun muvaffaqiyatli yakunlandi. Erkaklar o‘rtasida -81 kg vazn toifasidagi bellashuvlarda ikki nafar vakilimiz shohsupaga ko‘tarildi.
Buenos-Ayres-2018 o‘smirlar Olimpiadasi kumush medal sohibi Muhammadqodir Toshtemirov mazkur musobaqada 343 kg natija qayd etib, g‘alabaga asosiy daʼvogar ekanligini amalda ko‘rsatib berdi. Murosasiz bellashuvda vakilimiz eng yaqin taʼqibchisi, Argentinada atigi 1 kg farq bilan undan ustun kelgan armanistonlik Karen Margaryandan bu gal naqd 16 kg ilgarlab ketdi va o‘smirlar Olimpiadasi uchun munosib revansh oldi. Margaryanga 1 kg imkoniyatni boy bergan boshqa bir yosh vakilimiz Hojiakbar Olimov esa shohsupaning uchinchi pog‘onasidan joy oldi.
Yoshlar o‘rtasida JCH
Yigitlar, -81 kg:
1. Muhammadqodir Toshtemirov (O‘zbekiston) – 343 (161+182) kg;
2. Karen Margaryan (Armaniston) – 327 (152+175) kg;
3. Hojiakbar Olimov (O‘zbekiston) – 326 (150+176) kg.
