Xanchjou-2022 Osiyo o’yinlari doirasida zamonaviy beshkurash bo’yicha saralash bellashuvlari musobaqaning ochilish marosimidan avval start oladi. Aniqrog’i, 20-24-sentyabr kunlari mazkur sport turida qit’amizning eng kuchli sportchilari bahs olib borishadi. Bugun unda qatnashadigan O’zbekiston terma jamoasi Xanchjou shahriga yetib bordi.

Osiyo o’yinlarida Tokio-2020 Olimpiadasi ishtirokchisi Alise Faxrutdinova, shuningdek, Samira Abzalova, Sadriddin Qobiljonov va Doniyor Rahimov yurtimiz sharafini himoya qilishadi. Mazkur dasturda Parij-2024 Olimpiadasining yo’llanmalari ham o’ynalishi unga bo’lgan qiziqishni yanada oshiradi. Bugun jamoamiz Atletlar shaharchasiga joylashdi. Sportchilarimiz ertadan O’yinlar oldidan so’nggi tayyorgarlik jarayoniga kirishishadi.