Elshod Rasulov boshchiligidagi boks boʻyicha Oʻzbekiston ayollar terma jamoasi ham Xanchjou-2022 Osiyo oʻyinlariga tayyorgarlikni davom ettirmoqda. Musobaqada ishtirok etadigan har bir qizimiz oʻz nomini oʻzbek boksi solnomasiga yozdirib qoʻyishga shay.

Boisi, ular Osiyo oʻyinlarida boks boʻyicha ayollar oʻrtasida shohsupaga koʻtarilgan birinchi sportchilarimizga aylanishi mumkin. Qolaversa, qizlarimiz Parij-2024 Olimpiadasi yoʻllanmalari uchun jang qilishadi. Ushbu jamoa ham yigitlarimiz singari 12-sentyabr kuni Xanchjou shahriga yoʻl olib, musobaqa oldidan soʻnggi tayyorgarlikni Xitoyda olib boradi.