Oʻzbekiston iftixori Ravshan Irmatovni tabriklaymiz!
Bugun oʻzbek sportining yorqin vakili, futbol boʻyicha Osiyoning 5 karra eng yaxshi hakami, 2015-yil dunyoning eng yaxshi referisi Ravshan Irmatov tavallud ayyomini nishonlamoqda.
Ravshan Sayfuddinovich Irmatov 1977-yil 9-avgust kuni tugʻilgan. FIFA referisi sifatida faoliyat olib borgan Ravshan Sayfuddinovich dunyo futboli tarixida jahon chempionatlarida eng koʻp oʻyin boshqargan hakamdir. Hamyurtimiz JAR-2010 mundialida 5 ta, Braziliya-2014 da 4 ta va Rossiyada oʻtgan jahon chempionatida 2 ta, jami 11 ta uchrashuvni boshqarib borgan. Bir necha bor klublar oʻrtasidagi JCH, Osiyo kubogi, OCHL, shuningdek, turli yosh toifalaridagi jahon chempionatlari, Olimpiya oʻyinlari va boshqa nufuzli musobaqalarning asosiy oʻyinlarida hakamlik qilgan. 2015-yil esa jahonning eng yaxshi referisi deb topilgan. Ravshan Sayfuddinovichnnig bunday xizmatlari davlatimiz tomonidan munosib baholanib, “Buyuk xizmatlari uchun” va “El-yurt hurmati” ordenlari, “Oʻzbekiston iftixori” faxriy unvoni bilan taqdirlangan. Hozirda Oʻzbekiston Milliy Olimpiya qoʻmitasi raisining birinchi oʻrinbosari, Oʻzbekiston futbol assotsiatsiyasining birinchi vitse-prezidenti lavozimlarida faoliyat olib bormoqda.
Oʻzbekiston Milliy Olimpiya qoʻmitasi Ravshan Irmatovni tugʻilgan kuni bilan tabriklab, unga uzoq umr, sihat-salomatlik tilab qoladi.
