Toshkentda oʻtkazilgan “Osiyolik yosh xokkeychilar uchun oʻquv-mashgʻulot yigʻini” loyihasidan soʻng Xalqaro muz ustida xokkey federatsiyasi (IIHF) va Oʻzbekiston Milliy Olimpiya qoʻmitasi oʻrtasidagi aloqalarni yanada mustahkamlash mavzusiga bagʻishlangan uchrashuv boʻlib oʻtdi. Unda IIHF vitse-prezidenti Ayvaz Omarkanov, MOQ raisi oʻrinbosarlari Ravshan Irmatov va Sherzod Tashmatov mavzuga doir istiqbolli rejalarni muhokama qilishdi.

Mazkur uchrashuvda Oʻzbekiston xokkey federatsiyasi Ijrochi direktori Elbek Mahmudov ham ishtirok etdi. Ayvaz Omarkanov 7 kunlik xalqaro yigʻin yuqori saviyada oʻtkazilgani uchun mamlakatimiz hukumati va tashkiliy qoʻmita aʼzolariga minnatdorchilik bildirdi. Xususan, u oʻz nutqi davomida Oʻzbekiston kelgusida nafaqat bu kabi yigʻinlar, balki xalqaro miqyosdagi musobaqalar, turli yosh toifalaridagi qitʼa birinchiliklarini ham aʼlo darajada oʻtkazishi mumkinligini qoʻshimcha qildi.

MOQ mutasaddilari mamlakatimizda nafaqat yozgi, balki qishki sport turlarini ham rivojlantirish borasida olib borilayotgan ishlarga toʻxtalib, poytaxt va turli viloyatlarda buning uchun katta infratuzilma yaratilayotgani haqida gapirib oʻtishdi. Shuningdek, Toshkentning turli yoshdagi Osiyo chempionatlarini oʻtkazish uchun imkoniyati yetarli ekani, bu kabi musobaqalar yurtimizda qishki sport turlari, xususan, xokkeyni yanada keng targʻib qilishga katta yordam berishini taʼkidlashdi.

Suhbat davomida tomonlar tashkilotlar oʻrtasidagi aloqalarni yanada mustahkamlash, kelgusida bu kabi yangi yirik loyihalarni oʻtkazish kabi mavzularda fikr almashishdi.