Chendu-2021: Taekvondo WT va ushu dasturlarida uchta medal
Xitoy mezbonlik qilayotgan Butunjahon yozgi Universiada oʻyinlarining yana bir kuni ortda qoldi. Bugun Oʻzbekiston terma jamoasi 1 ta kumush va 2 ta bronza medallariga sazovor boʻldi.
Taekvondo WT bahslarida ikki karra jahon chempionati sovrindori Feruza Sodiqova kumush medalni qoʻlga kiritdi. Sodiqova -62 kg vazn finalida tailandlik raqibasiga imkoniyatni boy berdi. Shuningdek, musobaqada yarim finalga yetib borgan Najmiddin Qosimhojiyev (-74 kg) bronza medali bilan taqdirlandi.
Qolaversa, ushuning jangovar yoʻnalishida -80 kg vazn toifasida yarim final bosqichiga qadar yetib kelgan Azizbek Isroilov ham shohsupaning uchinchi pogʻonasidan joy oldi. Shu tariqa, Oʻzbekiston delegatsiyasining hozirgacha jamgʻargan medallari 7 ta kumush va 3 ta bronzani tashkil etmoqda.
