Dzyudo boʻyicha Oʻzbekiston erkaklar terma jamoasi 4-6-avgust kunlari oʻtkaziladigan “Masters” turniri, Xanchjou-2022 Osiyo oʻyinlari, shuningdek, yil davomida kutib turgan boshqa nufuzli turnirlarga tayyorgarlikni qizgʻin davom ettirmoqda. Gruziyaning togʻli hududida oʻtgan yigʻindan soʻng polvonlarimizning mashgʻulotlari Niderlandiyaga koʻchdi.

Arnem shaharchasida oʻtkazilayotgan xalqaro yigʻinda yigitlarimiz asosiy tarkib bilan qatnashmoqda. Unda 30 dan ortiq mamlakatdan tashrif buyurgan dzyudochilar jam boʻlgan. Gruziyada jismoniy holatini yaxshilab olgan hamyurtlarimiz ushbu yigʻinda texnik va taktik uslublar ustida ishlashmoqda. Niderlandiya safariga Davlat Bobonov, Muzaffarbek Toʻraboyev, Alisher Yusupov kabi terma jamoamizning 15 aʼzosi jalb etilgan.