Maʼlum qilganimizdek, dzyudo va ogʻir atletika boʻyicha Oʻzbekiston terma jamoalari ayni paytda Gruziyaning Bakuriani shahrida oʻquv-mashgʻulot yigʻinida ishtirok etishmoqda. Eʼtiborlisi, har ikki terma jamoamiz bugungi mashgʻulotni birgalikda oʻtkazdi.

Shubhasiz, sportchilarimizning xorijda nafaqat oʻzaro uchrashishgani, balki bunday doʻstona ruhda mashgʻulot olib borishlari ularning kayfiyatini yanada koʻtaradi. Mashgʻulot jarayonida har ikki terma jamoa umumiy jismoniy tayyorgarlikni kuchaytirishga eʼtibor qaratdi. Ogʻir atletikachilarimiz dzyudochilarimizga tosh bilan ishlashning oʻziga xos texnikalarini oʻrgatishdi.

Oʻz navbatida, har ikki jamoa bosh murabbiylari Ilias Iliadis hamda Bahrom Mendiboyev mashgʻulot uchun bir-birlariga minnatdorchilik bildirib, atletlarimizga kelgusi musobaqalarda omad tilashdi.