Ayni kunlarda boks boʻyicha Oʻzbekiston ayollar terma jamoasi Xitoyning Xenan provinsiyasida oʻquv-mashgʻulot yigʻinida boʻlib turibdi. 7-iyulga qadar davom etadigan mazkur yigʻinga Xanchjou-2022 Osiyo oʻyinlarida ishtirok etishi kutilayotgan 10 nafar sportchi jalb qilingan. Yigʻin borasida terma jamoa bosh murabbiyi Elshod Rasulov quyidagi fikrlarni bildirib oʻtdi:

“Yigʻin uchun aynan Xitoy mamlakati va ushbu terma jamoani tanlab olishimizdan asosiy maqsad ular boʻlajak Osiyo oʻyinlarining mezbonlari ekani. Ushbu yigʻinda mahalliy iqlimga moslashish barobarida xitoylik bokschi qizlar bilan koʻplab sparring janglarini olib bormoqdamiz. Maʼlumki, Xitoyning ayollar terma jamoasi boksda dunyoning eng kuchli termalaridan hisoblanadi. Bu yigʻin orqali shogirdlarim katta tajriba toʻplashmoqda”.