Murodjon Xolmurodov Tokioda yurt sharafini himoya qiladi
O‘zbekiston Milliy Olimpiya qo‘mitasi yo‘lga qo‘ygan “Ular Tokioda yurt sharafini himoya qilishadi” loyihasini davom ettiradi. Bu gal velosportning shosse yo‘nalishi bo‘yicha Tokio-2020 Olimpiya o‘yinlariga yo‘llanma olgan Murodjon Xolmurodov haqida batafsil maʼlumot beramiz.
Murodjon Xolmurodov 1982-yil Xorazm viloyatining Gurlan tumanida tug‘ilgan. Xalqaro toifadagi sport ustasi. Yoshligidan sportga mehr qo‘ygan qahramonimizga Mahmud Kuschanov, Ulug‘bek Haydarov va Omonboy Jumanovlardan velosportning ilk sirlarini o‘rgatgan. 1996-yil Toshkent shahridagi Respublika Olimpiya zaxiralari bilim yurtida o‘qishga qabul qilingan.
Qahramonimizning taʼkidlashicha, u velosportdan oldin boks, kurash singari sport turlari bilan shug‘ullangan. Ammo, Murodjon Xolmurodovda velosiped sportiga nisbatan o‘zgacha qiziqish va mehr paydo bo‘ladi.
1999-yildan O‘zbekiston milliy terma jamoasi aʼzosiga aylandi. 2010-yil Guanchjou (Xitoy)da XIV Osiyo o‘yinlarida ishtirok etib, 4-natijani qayd etgan.
2011-yil Tailandda o‘tgan shosse bo‘yicha Osiyo chempionatida 2-o‘rinni egallab, 2012-yil Buyuk Britaniyaning London shahrida bo‘lib o‘tadigan XXX yozgi Olimpiya o‘yinlari litsenziyasini qo‘lga kiritgan.
2013-yil Hindistonning Nyu-Deli shahrida bo‘lib o‘tgan Osiyo chempionatida 2 yo‘nalish bo‘yicha 2 ta oltin medalga sazovor bo‘ldi. 2018-yil Indoneziyaning Jakarta shahrida bo‘lib o‘tgan Osiyo o‘yinlarida shossening yakkalik vaqt dasturida kumush medalga ega chiqdi. Shu yili Malayziyada Osiyo chempionatida, Tailanddagi Osiyo kubogida 3-o‘rinlarni band etgan.
2019-yil poytaxtimizda o‘tgan veloshosse bo‘yicha Osiyo chempionatida qayd etgan natijasi bilan Tokio-2020 Olimpiya o‘yinlariga yo‘llanma oldi.
