“Yangi nafas” ommaviy yugurish musobaqasi doirasida Toshkent shahrida oʻtgan bellashuvlarning gʻoliblari taqdirlandi
Xabaringiz bor, butun Respublikamiz boʻylab Xalqaro Olimpiya kuni va Yoshlar kuni munosabati bilan tashkil etilgan “Yangi nafas” ommaviy yugurish musobaqasi boʻlib oʻtdi. Dastavval, musobaqada 60 mingdan ziyod ishtirokchi qatnashishi kutilgan edi. Yakuniy tahlillarga koʻra, bu yilgi bahslar 100 mingdan ortiq ishtirokchini qamrab olgani maʼlum boʻldi.
Poytaxtimizdagi soʻlim “Milliy bogʻ” dam olish maskani Toshkent shahrida oʻtgan poygalarning gʻolib va sovrindorlarini taqdirlash marosimiga mezbonlik qildi. Unda Yoshlar siyosati va sport vazirligi, Oʻzbekiston Milliy Olimpiya qoʻmitasi, Oʻzbekiston yengil atletika federatsiyasi va hamkor tashkilotlarning mutasaddilari ishtirok etib, sovrindorlarga medal hamda esdalik sovgʻalarini topshirishdi. Eslatib oʻtamiz, Toshkent shahrida oʻtgan musobaqa 1 milya (1609 m), 3 va 10 km masofalarda tashkil etildi.
