Joriy yil o‘zbek boksi maktabiga tamal toshi qo‘ygan insonlardan biri, Rufat Risqiyev kabi ko‘plab taniqli o‘zbek bokschilariga ustozlik qilgan Sidney Jeksonning qizi Paina Kas 90 yoshni qarshi oldi. Qayd etish joiz, P.Kas uzoq yillar shifokor sifatida faoliyat olib borgan. Xususan, amaliy tibbiyotdan tashqari ko‘plab qo‘lyozmalari va ilmiy maqolalari bilan yurtimiz sport tibbiyoti rivojiga hissa qo‘shgan.

Bugun O‘zbekiston Milliy Olimpiya qo‘mitasida Paina Sidneyevnani ushbu yubiley yoshi bilan qutlash tadbiri bo‘lib o‘tdi. Unda Bahodir Maxsitov boshchiligidagi sportimiz faxriylari, MOQ raisi maslahatchisi Alisher Karimov hamda Qo‘mita xodimlari ishtirok etishdi. Mutasaddilar tadbir davomida Paina Sidneyevnaning bu boradagi xizmatlarini alohida eʼtirof etib, uning uzoq yillik fidoiy xizmatlari uchun minnatdorchilik izhor qilishdi.

Tadbir yakunida anʼanaga muvofiq, P.Kasga O‘zbekiston Milliy Olimpiya qo‘mitasining esdalik medali topshirildi.