Shosse yoʻnalishidagi bahslar yakunlandi, navbat trek dasturiga
Tailandning Rayong shahrida velosportning shosse yoʻnalishi boʻyicha U-20, U-23 yosh toifalari va kattalar oʻrtasida Osiyo chempionati oʻz yakuniga yetdi. Unda ishtirok etgan Oʻzbekiston terma jamoasi 2 ta oltin, 4 ta kumush va 3 ta bronza, jami 9 ta medalga sazovor boʻldi. Oʻzbekiston velosiped sporti federatsiyasining maʼlum qilishicha, ushbu natija bilan terma jamoamiz 27 davlat orasida uchinchi oʻrinni egalladi. Garchi yurtdoshlarimiz Parij-2024 Olimpiadasiga toʻgʻridan toʻgʻri yoʻllanma beruvchi yoʻnalishlarda shohsupaga koʻtarila olmagan boʻlishsada, qimmatli reyting ochkolarini oʻz hisoblariga yozdirib qoʻyishdi. Musobaqada sportchilarimiz quyidagi yoʻnalishlarda shohsupaga koʻtarilishdi:
Oltin medal:
Olga Zabelinskaya (individual start poygasi, kattalar)
Yanina Kuskova (individual start poygasi, U-23)
Kumush medal:
Aralash jamoaviy poyga (kattalar)
Aralash jamoaviy poyga (U-23)
Asal Rizayeva (individual start poygasi, U-20)
Yanina Kuskova (guruh poygasi, U-23)
Bronza medal:
Aralash jamoaviy poyga (U-20)
Asal Rizayeva (guruh poygasi, U-20)
Begzod Rahimboyev (guruh poygasi, U-23)
Terma jamoamiz ayni paytda Tailanddan Malayziyaga yetib bordi. Sportchilarimiz endilikda 19-iyun kuniga qadar trek yoʻnalishida qitʼa birinchiligi uchun bahs olib borishadi.
