Osiyo Futbol Konfederatsiyasi U-23 Osiyo kubogi saralash oʻyinlariga mezbonlik qiladigan davlatlarning nomini eʼlon qildi. Unga koʻra, Oʻzbekiston Olimpiya terma jamoasi qurʼa natijasidan soʻng oʻrin oladigan guruh uchrashuvlari yurtimiz maydonlarida oʻtkaziladi. Oʻyinlar joriy yilning 4-12-sentyabr kunlari oʻtkazilishi rejalashtirilgan.

Eslatib oʻtamiz, ushbu bosqich Parij-2024 Olimpiya oʻyinlari yoʻlidagi dastlabki saralash turniri hisoblanadi. Unga qurʼa tashlash marosimi 25-may kuni soat 12:00 da Kuala Lumpurdagi OFK qarorgohida oʻtkaziladi. Musobaqaning final bosqichi 2024-yili Qatarda boʻlib oʻtadi.