Qashqadaryolik sportsevar yoshlar uchun bayram boshlandi
Kuni kecha MOQ raisining birinchi o‘rinbosari Ravshan Irmatov boshchiligidagi ishchi guruh Qashqadaryo viloyatiga tashrif buyurib, hududdagi yoshlar orasida sportni ommalashtirish, sog‘lom turmush tarzi targ‘ibotini kuchaytirish bo‘yicha mutasaddilarga tegishli ko‘rsatmalar bergan edi. Qayd etish joiz, viloyat va tuman hokimliklari, Milliy Olimpiya qo‘mitasi hamda Qashqadaryo viloyati turizm va sport bosh boshqarmasi hamkorligida qisqa fursat ichida amaliy ishlar boshlab yuborildi.
Hozirda viloyat bo‘ylab kichik Olimpiya o‘yinlari tashkil etilmoqda. Bunda barcha tumanlarda maʼlum sport turlari bo‘yicha bellashuvlar tashkil etilgan. Hozirgacha G‘uzor tumanida voleybol, Qarshi shahrida dzyudo, Dehqonobod tumanida esa milliy kurash bo‘yicha bahslar bo‘lib o‘tdi. Ayniqsa, Dehqonobod tumanida o‘tgan kurash bahslari mahalliy aholi uchun chinakam bayramga aylandi.
