Chavandozlarimiz Bishkekdagi musobaqada qatnashishadi
Aprel oyida poytaxtimiz ot sportining konkur yoʻnalishi boʻyicha “Grand Prix Euratsia league” va “FEI Jumping Nations Cup Euratsia league Tashkent 2023» musobaqalariga mezbonlik qilgan edi. Bugun Qirgʻizistonning Bishkek shahrida ushbu musobaqalarning navbatdagi bosqichi boshlandi.
Hamyurtlarimiz bellashuvlarda toʻliq tarkibda ishtirok etishadi. Turnirda terma jamoa bosh murabbiyi va amaldagi sportchi Bekzod Kurbanov, shuningdek, Umid Kamilov, Nurjon Tuyakbayev, Xurshidbek Alimdjanov, Azam Tolibboyev, Saidamirxon Turgunboyev konkur boʻyicha bahslarda ishtirok etishsa, Alyona Derevyanko ot yoʻrttirish dasturida yurtimiz sharafini himoya qiladi. Qolaversa, chavandozlarimizning tulporlariga tajribali otboqarlar Muslim Akramov, Dilshod Omonov, Komiljon Matmusayev va Sardor Muxammadiyev masʼul hisoblanishadi.
14-mayga qadar davom etadigan masʼuliyatli bahslarda yurtdoshlarimizga omad tilaymiz.
