Toshkent viloyatidagi Yangibozor shaharchasida joylashgan sport maktabida zamonaviy beshkurashning bir qator turlari boʻyicha oʻsmirlar va kattalar oʻrtasida Oʻzbekiston chempionati boʻlib oʻtdi. Musobaqa davomida sportchilar ikkikurash, uchkurash va toʻrtkurash boʻyicha oʻzaro bahs olib borishdi.

Qiziqarli oʻtgan bellashuvlarda yurtimizning turli viloyatlari, shuningdek, Qoraqalpogʻiston Respublikasidan tashrif buyurgan sportchilar gʻoliblik yoʻlida oʻz mahoratlarini namoyish etishdi. Bahslar davomida murabbiylar shtabi terma jamoaga nomzod bir qator iqtidorli yoshlarni saralab oldilar.

Chempionat yakunida oʻtgan taqdirlash marosimida Yuqori Chirchiq tumani hokimi Uskenbay Atemov, Bahromjon Gaziyev boshchiligidagi Oʻzbekiston zamonaviy beshkurash federatsiyasi raisi mutasaddilari ishtirok etib, gʻolib va sovrindorlarga esdalik sovgʻalarini taqdim qilishdi.