Xanchjou Osiyo oʻyinlari tarixidagi eng yaxshi musobaqani oʻtkazishga bel bogʻlagan
Xitoyning Xanchjou shahrida boʻlajak Osiyo oʻyinlarida ishtirok etadigan delegatsiyalar rahbarlari uchun seminar boʻlib oʻtdi. 2 kun davom etgan mazkur tadbirda Oʻzbekiston Milliy Olimpiya qoʻmitasi departament direktorlari Kamoliddin Ergashev hamda Mirjalol Saydullayevlar ishtirok etishdi.
Seminar davomida tashkiliy qoʻmita vakillari tomonidan musobaqani oʻtkazish boʻyicha soʻnggi talablar, delegatsiyalarni kutib olish va kuzatish, transport-logistika yoʻnalishlari, ishtirokchi davlatlarga yaratiladigan sharoitlar, COVID-19 infeksiyasiga qarshi kurashish yuzasidan talablar boʻyicha batafsil tushuntirish berildi. Maʼlum qilinishicha, Ochilish marosimida har bir mamlakatdan 1 nafardan erkak va ayol sportchi bayroqdor boʻladi. Gender tenglikni taʼminlash boʻyicha katta kompleks musobaqalarda qoʻllanilayotgan ushbu amaliyot oʻyinlarning ajralmas qismidan biriga aylanib ulgurdi. Seminar davomida Xanchjoudan tashqari bellashuvlarga mezbonlik qiladigan yana 5 ta shahar infratuzilmasi boʻyicha ham maʼlumot taqdim qilindi. Tashkiliy qoʻmitaning maʼlum qilishicha, 27-iyul kuni jamoaviy sport turlariga qurʼa tashlash marosimi boʻlib oʻtadi.
Seminardan soʻng bellashuvlar oʻtkaziladigan sport obyektlari va Olimpiya shaharchasi, delegatsiya rahbarlari, OAV xodimlari istiqomat qiladigan mehmonxonalar boʻylab ekskursiya oʻtkazildi. Qayd etish joiz, tashkiliy qoʻmita tomonidan barcha yoʻnalishlarga aʼlo darajada eʼtibor qaratilgan. Sportchilarning yotoqxonalari, mashgʻulot va musobaqa zallari eng zamonaviy inventarlar bilan jihozlangan. Oshxonalarda ham har bir mintaqaga xoc boʻlgan taomlar tayyorlanadi.
Ekskursiya davomida shaharda ochilgan yangi muzey barchaning eʼtiborini tortdi. Xay-tek yoʻnalishida qurilgan maskan qitʼamizdagi Olimpiya harakati tarixiga bagʻishlangan. Ahamiyatlisi, bu mazkur yoʻnalishda ochilgan birinchi muzey hisoblanadi.
Oʻzbekiston MOQ xodimlarining Xitoydagi xizmat safari davom etadi. Hamkasblarimiz yana bir necha kun davomida sport inshootlarini qurish va musobaqalar tashkil etish boʻyicha ushbu mamlakat tajribasini oʻrganishadi.
