Doston Yoqubov va Muzaffarbek Toʻraboyevni tabriklaymiz!
Bugun oʻz yoʻnalishlarida kattalar oʻrtasida jahon chempionligini qoʻlga kiritgan oʻzbek polvonlari Doston Yoqubov va Muzaffarbek Toʻraboyev tavallud ayyomlarini nishonlashmoqda.
Doston Yoqubov 1995-yil 5-aprel kuni Toshkent viloyatida tugʻilgan. Rio-2016 Olimpiya oʻyinlari ishtirokchisi. 2017-yil Anaxaym (AQSH) shahrida oʻtgan kattalar oʻrtasidagi jahon chempionatida -67 kg vazn toifasida siltab koʻtarish mashqida oltin medalga sazovor boʻlgan. 2021-yil Toshkentda oʻtgan dunyo birinchiligida esa dast koʻtarish yoʻnalishida kumush, siltab koʻtarish va ikki kurash boʻyicha oltin medalni qoʻlga kiritgan. Shuningdek, uning hisobida 2018-yilgi Osiyo oʻyinlarining kumush, 2022-yilgi qitʼa chempionatining oltin medallari ham mavjud.
Muzaffarbek Toʻraboyev 2000-yil aynan shu kuni Surxondaryo viloyatida dunyoga kelgan. 2020-yil -100 kg vazn toifasida yoshlar va kattalar oʻrtasida mamlakat chempionligini qoʻlga kiritgan dzyudochimiz qisqa vaqt ichida jahon arenalarida ham oʻz soʻzini ayta oldi. 2021-yil Toshkent va Tbilisi, 2022-yil Parij “Katta dubulgʻa” musobaqasida bronza medaliga sazovor boʻldi. 2022-yil poytaxtimizda oʻtgan jahon chempionatida esa oltin medalni qoʻlga kiritdi.
Oʻzbekiston Milliy Olimpiya qoʻmitasi har ikki sportchimizni tugʻilgan kuni bilan qutlab, ularga uzoq umr, mustahkam salomatlik va yangi gʻalabalar tilab qoladi.
