Uchkurashchimiz Polshadagi musobaqada ishtirok etdi
Mamlakatimizda Olimpiya sport turlarining har bir dasturini yanada rivojlantirishga katta eʼtibor qaratilmoqda. Jumladan, ot sportining uchkurash yoʻnalishiga ham. Mazkur yoʻnalishda shakllantirilayotgan Oʻzbekiston terma jamoasi aʼzolari turli musobaqalarda ishtirok etib, xalqaro maydonda ulkan tajriba toʻplashmoqda.
Jumladan, uchkurashchimiz Alisher Erkinov 31-mart – 2-aprel kunlari Polshada oʻtgan “Strezagom Spring Open 2023” xalqaro musobaqasida qatnashdi. Hamyurtimiz mazkur turnirda garchi sovrindorlar qatoridan joy ololmagan boʻlsa ham Yevropaning sara 50 nafar chavandozi orasida oʻz mahoratini oshirishga muvaffaq boʻldi.
Maʼlumot uchun, uchkurash manejda ot yoʻrttirish, dala maydonlaridagi toʻsiqlardan sakrash va konkur dasturlarini oʻz ichiga oladi.
