Rekord darajadagi sovrin jamgʻarmasi, saralashda qatnashadigan hamyurtimiz yoxud Australian Open-2023 haqida qiziqarli faktlar
Yaqinlashib kelayotgan tennis boʻyicha Avstraliya ochiq chempionati 2023-yilning dastlabki yirik musobaqalaridan hisoblanadi. Bu yil ham turnir shiddatli va murosasiz kurashlarga boy oʻtishi kutilmoqda. Oʻtgan yil serbiyalik Novak Jokovich viza bilan bogʻliq muammolar sabab musobaqani oʻtkazib yuborgan edi. Bu yil boshqa bir yulduz, ayni paytda jahon tasnif jadvalini boshqarib borayotgan ispaniyalik Karlos Alkaras jarohati sabab “Katta dubulgʻa” turnirida qatnashmaydigan boʻldi. Xoʻsh, joriy yil 111-bor oʻtkaziladigan musobaqa haqida yana nimalarni bilamiz?
Turnir oʻtadigan sana: 16-29-yanvar.
Sovrin jamgʻarmasi: 51,5 million AQSH dollari. Yakkalik yoʻnalishida gʻalaba qozonadiganlar 2,054 million dollarga ega boʻlishadi. Asosiy davraning 1-bosqichida magʻlub boʻlgan sportchi 75 160 dollar bilan qaytadi.
Amaldagi gʻoliblar: Rafael Nadal (Ispaniya); Eshli Barti (Avstraliya); N.Kiryos / T.Kokkinakis (Avstraliya); B.Kreychikova / K.Sinyakova (Chexiya); K.Mladenovich (Fransiya) / I.Dodig (Xorvatiya).
Gʻolib uchun reyting ochko: 2000
Mazkur musobaqa saralash bosqichida hamyurtlarimizdan Nigina Abduraimova ishtirok etadi. Ayni paytda jahon reytingida 180-pogʻonada turgan tennischimiz ertaga birinchi oʻyinini ispaniyalik Leyre Gormazga (169) qarshi oʻtkazadi.
Musobaqani oʻtkazib yuboradigan taniqli sportchilar: Karlos Alkaras (Ispaniya), Gael Monfis (Fransiya), Simona Xalep (Ruminiya), Naomi Osaka (Yaponiya).
