Misr poytaxti Qohira shahrida oʻq otish sporti boʻyicha jahon chempionati davom etmoqda. Musobaqaning bugungi kuni Oʻzbekiston yoshlar terma jamoasi uchun unutilmas natija bilan tarixda qoladigan boʻldi. Boisi, unda 10 metrga pnevmatik toʻpponchadan otish boʻyicha erkaklar oʻrtasidagi jamoaviy bahsda qatnashgan yigitlarimiz kumush medalni qoʻlga kiritishdi.

Hamyurtlarimiz hal qiluvchi bahsda hindistonlik tengqurlariga qarshi bahs olib borishdi. Murosasiz kechgan bellashuvda Hindiston jamoasi 16:8 hisobida gʻalaba qozondi va oltin medallarni rasmiylashtirdi.

Musobaqa davomida yurtimiz sharafini munosib himoya qilgan Muhammad Kamolov, Veniamin Nikitin va Ilhombek Obidjonovga tasanno aytamiz. Barakalla, yigitlar!