BAAning Abu-Dabi shahrida dzyudo bo‘yicha “Katta dubulg‘a” turnirining birinchi kuni o‘z yakuniga yetmoqda. Quvonarlisi, unda ishtirok etgan hamyurtimiz Diyora Keldiyorova -52 kg vazn toifasida kumush medalga sazovor bo‘ldi.

Sportchimiz murosasiz kechgan finalda fransiyalik Astrid Gnetoga qarshi bahs olib bordi. Afsuski, bellashuvda yevropalik dzyudochining qo‘li baland keldi. Bu Keldiyorova uchun “Katta dubulg‘a” turnirlaridagi to‘rtinchi medal bo‘ldi.

Ushbu natija orqali Diyora jahon reytingi uchun 700, Parij-2024 Olimpiadasi yo‘lida 350 ochkoni o‘z hisobiga yozib qo‘ymoqda.