Bugun oʻzbek boksining taniqli vakillaridan biri, super ogʻir vazn toifasida sobiq jahon chempioni Ruslan Chagayev tavallud ayyomini nishonlamoqda.

Chagayev Ruslan Shamilovich 1978-yil 19-oktyabr kuni Andijonda dunyoga kelgan. Havaskor boksda faoliyatini boshlagan hamyurtimiz ikki karra Osiyo va jahon chempioni, Bangkok-1998 Osiyo oʻyinlari gʻolibi, Sidney-2000 yozgi Olimpiya oʻyinlari ishtirokchisi hisoblanadi. 2007-yil Germaniyada oʻtgan boks oqshomida rossiyalik Nikolay Valuyevni yengib, super ogʻir vazn toifasida WBA kamarini qoʻlga kiritgan. Taʼkidlash joiz, Chagayev ogʻir vazn toifasida bunday titulga sazovor boʻlgan osiyolik ilk bokschidir. Vatanimiz nomini dunyoga tanitgan atletimiz davlatimiz tomonidan “Buyuk xizmatlari uchun” va “El-yurt hurmati” ordenlari, “Oʻzbekiston Respublikasida xizmat koʻrsatgan sportchi” hamda “Oʻzbekiston iftixori” faxriy unvonlari bilan taqdirlangan.

Oʻzbekiston Milliy Olimpiya qoʻmitasi Ruslan Chagayevni tavallud ayyomi bilan tabriklab, unga uzoq umr, sihat-salomatlik va ulkan muvaffaqiyatlar tilab qoladi.