Bugun mahoratli taekvondochilarimizdan biri Nikita Rafalovich tavallud ayyomini nishonlamoqda.

Rafalovich Nikita Igorevich 1993-yil 10-oktyabr kuni Toshkent shahrida dunyoga kelgan. Taekvondo boʻyicha jahon chempionatining ikki karra finalchisi (2015 va 2017-yillar). 2014-yil Incheon shahrida oʻtkazilgan Osiyo oʻyinlarining kumush medal sohibi. 2018-yil Osiyo oʻyinlari va Osiyo chempionati gʻolibi. Hamyurtimiz joriy yil Koreya Respublikasida oʻtkazilgan qitʼa birinchiligida ham tengsiz ekanligini namoyish qildi. Rio-2016 va Tokio-2020 Olimpiya oʻyinlarida yurtimiz sharafini himoya qilgan. Qayd etgan natijalari evaziga davlatimiz tomonidan “Kelajak bunyodkori” medali bilan taqdirlangan.

Oʻzbekiston Milliy Olimpiya qoʻmitasi Nikita Rafalovichni tavallud ayyomi bilan tabriklab, unga uzoq umr, sihat salomatlik va ulkan gʻalabalar tilab qoladi.