Bugun Surxon oʻlkasining taniqli polvoni Sharofiddin Lutfillayev tavallud ayyomini nishonlamoqda.

Sharofiddin Lutfillayev 1990-yil 9-sentyabr kuni Surxondaryo viloyatida tugʻilgan. Dzyudo boʻyicha 2019-yil Tokio shahrida boʻlib oʻtgan jahon chempionatida -60 kilogramm vazn toifasida kumush medalni qoʻlga kiritgan. Shuningdek, 5 karra Gran-pri turnirlari gʻolibi, 6-marta “Katta dubulgʻa” va 3 karra “Masters” tasnifidagi musobaqalar sovrindori sanaladi. Mazkur muvaffaqiyatlari evaziga yurtboshimiz tomonidan “Mard oʻgʻlon” davlat mukofoti bilan taqdirlangan. Tokio-2020 Olimpiya oʻyinlarida -60 kg vazn toifasida ishtirok etdi. Hozirda oʻzi tugʻilib oʻsgan hududda murabbiylik faoliyatini olib bormoqda.

Oʻzbekiston Milliy Olimpiya qoʻmitasi Sharofiddin Lutfillayevni tugʻilgan kuni bilan tabriklab, unga uzoq umr, sihat-salomatlik va ulkan muvaffaqiyatlar tilab qoladi.