Yevrosiyo ligasi doirasidan oʻrin olgan “Maxima Masters Team Competition” musobaqalar seriyasi yakunlandi
Chavandozlarimiz soʻnggi bosqichni umumjamoa hisobida ikkinchi oʻrinda yakunlashdi. Biroq bu hamyurtlarimizning mavsum yakuni boʻyicha birinchi oʻrinda qolishlari uchun hech qanday toʻsqinlik qila olgani yoʻq.
Qayd etish joiz, 4 bosqichdan iborat musobaqaning Oʻzbekiston, Qirgʻiziston va Qozogʻistonda oʻtgan bahslarida chavandozlarimiz ajoyib ishtiroklari bilan har gal birinchi oʻrinni qoʻlga kiritib, muddatidan avval mavsum gʻolibligini rasmiylashtirgan edilar. Ushbu muvaffaqiyat hamyurtlarimizga Barselonada oʻtadigan final bosqichi eshigini ochgan. Shu oʻrinda murosasiz bahslar davomida terma jamoamiz sharafini munosib himoya qilgan Bekzod Qurbonov, Nurjan Tuyakbayev, Xurshidbek Alimjonov, Umid Kamilov va Aʼzam Tolibboyevlarni alohida eʼtirof etib, jamoamizga kelgusi startlarda ham omad tilaymiz.
