O‘zbekiston Milliy Olimpiya qo‘mitasi raisi o‘rinbosari, mamlakat dzyudo federatsiyasi raisi Azizjon Kamilov terma jamoa murabbiylari va sportchilar bilan uchrashuv o‘tkazdi.

O‘zbekiston Milliy Olimpiya qo‘mitasida o‘tgan uchrashuvning asosiy mavzusi avgust oyida terma jamoamizni kutib turgan ikki asosiy musobaqaga tayyorgarlik haqida bo‘ldi. 4-7 avgust kunlari Qozog‘iston poytaxti Nur-Sultan shahri kattalar o‘rtasidagi Osiyo chempionatiga mezbonlik qilsa, 15-17 avgust kunlari Islom birdamligi o‘yinlari dasturidan o‘rin olgan dzyudo bahslari bo‘lib o‘tadi. Har ikkala musobaqada O‘zbekiston terma jamoasi to‘liq tarkibda ishtirok etadi.

Ilias Iliadis murabbiyligidagi erkaklar terma jamoasi musobaqalarga Gruziyaning tog‘li Bakuriani shahrida tayyorgarlik ko‘rdi. Marko Shpitka boshchiligidagi ayollar terma jamoamiz esa ayni paytda Isroilning Tel-Aviv shahrida tashkil etilgan xalqaro o‘quv-mashg‘ulot yig‘inida ishtirok etmoqda. Ular bilan ham MOQdagi uchrashuv chog‘ida ZOOM platformasi orqali bog‘lanib, musobaqalarning ahamiyati tushuntirildi.

Uchrashuvda Azizjon Kamilov har ikkala musobaqa nafaqat O‘zbekiston dzyudo federatsiyasi, balki mamlakatimiz sporti uchun ham o‘ta muhimligini ta’kidlab, jamoamizga tayyorgarlikni yanada kuchaytirish bo‘yicha muhim ko‘rsatmalar berdi.