9-18-avgust kunlari Turkiyaning Konya shahrida boʻlib oʻtadigan Islom birdamligi oʻyinlarida ishtirok etuvchi Oʻzbekiston delegatsiyasi ayni paytda barcha jabhalarda katta masshtabda tayyorgarlik olib bormoqda. Bugun MOQ raisi oʻrinbosari Sherzod Tashmatov Qoʻmita qoshidagi Respublika sport tibbiyoti ilmiy-amaliy markazi shifokorlari bilan boʻlajak musobaqaga tayyorgarlik jarayoni boʻyicha uchrashuv oʻtkazdi.

Unda musobaqaga joʻnab ketadigan shifokorlar va ishchi guruh tarkibi yana bir karra koʻrib olindi. Markaz shifokorlari hozirda terma jamoalarimiz musobaqadan avval chuqurlashtirilgan tibbiy koʻrikdan oʻtkazilayotgani, ularning salomatligi boʻyicha soʻnggi maʼlumotlar qandayligi haqida umumiy hisobot berishdi.

Musobaqaga sanoqli kunlar qolgani bois Sherzod Tashmatov har bir sportchimizning salomatligiga yanada katta eʼtibor qaratish zarurligini taʼkidladi. Shuningdek, suhbat davomida Turkiyada delegatsiyamiz uchun kerak boʻladigan birinchi tibbiy yordam vositalari va boshqa kerakli dorilar roʻyxatini shakllantirish boʻyicha ham fikr almashildi.