Bugun AQShning Yujin shahrida yengil atletika bo‘yicha jahon chempionatining navbatdagi kun bellashuvlari bo‘lib o‘tadi. Biz uchun ahamiyatlisi, unda hamyurtimiz Safina Sadullayeva balandlikka sakrash dasturida final bosqichida ishtirok etadi.

Bellashuv mahalliy vaqt bilan 17:40, Toshkent vaqti bilan esa 20 iyul tong sahar 05:40 ga to‘g‘ri keladi. Unda ushbu yo‘nalishda ayni paytda dunyoning eng kuchli 12 nafar atleti medallar uchun kurash olib boradi.

Eslatib o‘tamiz, saralash bahslarida 29 nafar sportchi ishtirok etdi. Unda 1.93 metr natija qayd etgan Sadullayeva final yo‘llanmasiga sazovor bo‘lgan. Qayd etish joiz, kvalifikatsiyada hamyurtimiz bilan atigi 5 nafar sportchigina barcha balandliklarni bir urinishda zabt eta olgan. Bo‘lajak finalda Sadullayevaga ana shunday omadli ishtirok tilab qolamiz.